Paano Magluto Ng Masarap Na Adobong Baboy

Ang adobo ay isang uri ng pagluluto na ginagamitan ng suka at toyo. Maraming iba't ibang sangkap ang pwedeng gawing adobo ( gulay, lamang dagat, mga carne).Marami ring paraan ng pagluluto nito mula sa iba't ibang panig ng Pilipinas. Kung gusto mong masarap ang adobo, gayahin mo itong ibabahagi ko.

Mga sangkap:
1 kilo baboy (hiniwa)
1/2  tasa toyo
3/4 tasa suka
4 butil ng bawang (dinikdik)
pamintang durog ( ayon sa iyong panlasa
asin ayon sa iyong panlasa
2 tasa  tubig.

Paraan ng Pagluluto:
1. Igisa ang bawang hanggang sa medyo brown na ito saka ilagay ang karne ng baboy, lagyan ng asin at paminta ayon sa iyong panlasa, sangkutsain ito ng 3 minuto.
2. Ilagay ang toyo at suka, hintaying kumulo saka haluin, dahil kung hahaluin ito na hindi pa kumukulo ang suka nakakaapekto ito sa texture ng karne.Pakuluin ng 5 minuto.
3. Ilagay ang tubig, ituloy ang pagpapakulo, hanggang sa malapit ng lumambot at haluin paminsan minsan. Kapag malambot na ay patayin ang apoy, hanguin ang carne at patitisin ang sabaw. Ilagay sa isang tabi ang kalderong may sabaw.
4. Mag-init ng mantika, prituhin ang adobo hanggang sa maging medyo brown. Kapag tapos na ang prosesong ito ay ibalik sa kaldero na pinagkuhaan nito, sa katamtamang init ng apoy ay isalang ito hanggang sa tuluyan ng lumambot ang karne at lumapot ang sabaw ng adobo.
5. Ihain kasama ng kanin, maghugas ng kamay dahil magkakamay tayo :-).
Ang sarap nito mga kabayan, subukan na.

Kung gusto nyong iimprove ang lasa sa pamamagitan ng paglagay ng mga powder na panimpla nasa sa inyo na po yon.

Paalala:
Mag ingat sa pagpipirito nito, dahil tumatalsik ang mantika, takpan ang kawali habang pinipirito para maiwasang matalsikan ang sinoman.

Inihaw na Giniling

Nakakain na po ba kayo ng inihaw na giniling na karne? Kung hindi pa dapat subukan nyo ang recipe na ito, mapapawow kayo sa sarap :-).

Mga sangkap:
1 kilo giniling na baka
1 piraso malaking green bell pepper (maliliit na hiwa)
1 piraso malaking red bell pepper (maliliit na hiwa)
1 piraso sibuyas (maliliit na hiwa)
asin ayon sa iyong panlasa
paminta ayon sa iyong panlasa
12 piraso barbecue stick


Paraan ng pagluluto:
1. Pagsama-samahin ang lahat ng sangkap at haluing maigi. Ilagay sa refrigerator ng overnight bago lutuin. Para mas maganda ang texture ng karne kapag iihawin na.

2. Alisin sa refrigerator at haluing maigi at hatiin sa 10-12 na bahagi. Bawat bahagi ay huhulmahin sa kamay na parang longganisa.
3. Kapag nahulma na ay itusok ang barbecue stick saka ihawin hanggang sa maluto. Sa pag iihaw dapat di katamtaman lang ang init para maluto hanggang sa loob pero hindi sunog ang labas na bahagi.

4. Kapag luto na ay pwede na itong ihain. 

Hindi na kailangang gamitan ng harina at itlog dahil habang hinahalo ang giniling nabrebreak ang meat protein kaya nagdidikitdikit itong kusa kahit di lagyan ng harina at itlog.

Kung gusto nyong iimprove ang lasa sa pamamagitan ng paglagay ng mga powder na panimpla (beef powder, vetsin, etc.) nasa sa inyo na po yon.

Paano Lutuin Ang Masarap na Inihaw na Baboy

Ang inihaw na baboy ay isa sa mga paborito kong ulam, mmmmm sarap lalo na kapag ang sawsawan mo ay nanonoot sa dila ang lasa, pagkagat mo ng inihaw mapapapikit ka sa sarap :-). Masarap na parte para sa inihaw ay ang liempo dahil ito ay kombinasyon ng laman at taba, juicy ang inihaw kapag maykasamang taba.

Mga sangkap:
1 kilo liempo ng baboy (hiniwa na pang ihaw)
1/2 tasa  katas ng calamansi
1/2 tasa  ng toyo
asin ayon sa iyong panlasa (pero kung ang toyo ay sapat sa alat di na kailangan maglagay ng asin)
pamintang durog ayon sa iyong panlasa

Paraan ng Pagluluto:
1. Pagsamasamahin ang lahat ng sangkap at ibabad ng 30 minuto bago lutuin.
2. Alisin sa pinagbabaran at huwag itapon ang katas ng pinagbabaran dahil ipapahid natin ito sa carne habang iniihaw. Kung walang katas ang pinagbabaran pwedeng gumawa ng toyo at calamansi na ipapahid sa carne habang iniihaw ito. Nakakatulong ito para lalong sumarap ang inihaw.
3. Kapag luto na ay hiwain ayon sa laki na gusto mo at ihain kasama ng kanin at paborito mong sawsawan.
Kung gusto nyong iimprove ang lasa sa pamamagitan ng paglagay ng mga powder na panimpla nasa sa inyo na po yon.

English Version
Ingredients:

• 1 kilo pork belly ( sliced to a grilling size)
• 1/2 cup calamansi or lemon juice
• 1/2 cup soy sauce ( if salty, no need to season the pork with salt)
• black pepper to taste

Procedure:

1. Combine all the ingredients and marinate it for 30 minutes.
2. Grill the pork belly and by using the marinade, baste the pork belly, and continue cooking until done.
3. Slice to bite size when it’s done then serve rice and your favorite dipping sauce.

If you want to improve the taste of grilled pork by putting powdered flavor enhancer, it’s up to you.

Paano Lutuin Ang Masarap na Macaroni Sopas

Ang sopas na macaroni ay karaniwang inihahanda bilang almusal o meryenda lalo na kapag medyo malamig ang panahon. Madaling lutuin at abot kaya ang halaga ng mga sangkap. Ikaw kabayan, kailan mo ito ihahanda para sa pamilya mo? Ito ang paraan ko ng madaling paghahanda ng sopas na ito. Sana magustuhan nyo.


Mga sangkap:
1/4 kilo elbow macaroni
1/4 kilo manok (hiniwa ng maliliit)
1/4 kilo repolyo (hiniwa)
1 piraso carrot (hiniwa)
1 tasa all purpose cream ( nestle, magnolia,etc)
3 butil ng bawang ( dinikdik)
1 buo sibuyas (hiniwa ng maliliit)
1 litro tubig
1 maliit na lata ng gatas (evaporada)
asin ayon sa iyong panlasa
paminta ayon sa iyong panlasa


Paraan ng pagluluto :
1. Igisa ang bawang at sibuyas saka ilagay ang manok, sangkutsahing maigi para maalis ang lansa, pagkatapos ng prosesong ito ay ilagay ang tubig saka pakuluin.
2. Kapag kumulo na ay ilagay ang macaroni at lutuin sa katamtamang init ng apoy, timplahan ayon sa iyong panlasa.
3. Kapag malapit ng maluto ay ilagay ang evaporada at all purpose cream, haluing maigi, pakuluin hanggang sa malambot na ang macaroni pero di naman malata.
4. Ilagay ang lahat ng natitirang sangkap at patayin ang apoy pagkatapos ng isang kulo.
5. Lagyan ng garnish bago ihain para lalong magustuhan ng mga mahal mo sa buhay. :-)

Kung gusto nyong iimprove ang lasa sa pamamagitan ng paglalagay ng mga powder na panimpla ay nasa sa inyo na po yon.

Paano Lutuin Ang Atay Ng Manok Na May Sarsa

Ang atay ng manok ay sagana sa Bitamina A na tumutulong pampalinaw ng mata at Bitamina B12 na tumutulong maiwasan ang anemia, pero mayroon itong mataas na content ng colesterol kaya dapat kumain lang ng katamtaman.Sagana rin ito sa folate na tumutulong para makalikha ng mga bagong celula sa ating katawan. Paborito ko ang atay ng manok, ikaw rin ba kabayan gusto mo ang atay ng manok?

Mga Sangkap:
1 kilo atay ng manok (hugasan at patulin ang tubig)
1/2 tasa toyo
1 tasa tubig (dagdagan kung kailangan)
bell pepper pula at green
1 sibuyas (hiniwa ng maliliit)
3 butil ng bawang dinikdik
1 kutsara luya hiniwa (strips)
dahon ng sibuyas
asin ayos sa iyong panlasa
paminta ayon sa iyong panlasa
1 kutsarita corn starch tunawin sa 2 kutsarang tubig

Paraan ng pagluluto:
1. Gisahin ang luya, bawang at sibuyas lakasan ang apoy saka ilagay ang atay hayaang magisa ito sa loob ng 2 minuto saka ilagay ang toyo at pakuluin ng 1 minuto.
2. Ilagay ang tubig at haluing maigi, timplahan ng asin at paminta kung kailangan saka pakuluin ng 3 minuto o  hanggang sa malapit ng maluto ang atay.
3.Ilagay ang corn starch at pakuluin hanggang sa lumapot, haluin ng haluin habang nilalagay ang cornstarch para di mamuo, ilagay ang bell pepper at sibuyas saka patayin ang apoy at ihain.

Huwag i-over cooked para hindi matigas ang texture ng atay.

Kung gusto nyong iimprove ang lasa sa pamamagitan ng paglagay ng mga powder na panimpla nasa sa inyo na po yon.

Paano Gawin Ang Sago Salad

Isa sa mga paborito kong ginagawa kapag may special na okasyon a ang sago salad, maraming pwede ilagay dito, nasa sa inyo na po kung ano ang mga idagdag nyong sangkap.

Mga Sangkap:

1/2 kilo sago (lutuin at salain, hugasan para maalis ang malagkit na texture)
2 lata  Gatas Condensada (malaki)
2 lata All purpose cream (Nestle, Magnolia, etc)
1 lata Gatas Evaporada
2 Mangga hinog( hiniwa ng dice)
1 apple (hiniwa ng dice)
3 saging lakatan (hiniwa ng dice)
1/2 tasa pasas

Paraan ng Paggawa:

1. Pagsama-samahin ang lahat ng mga sangkap at haluing maigi.
2. Palamigin saka ihain.

Paano Gawin Ang Macaroni Salad

Ang macaroni salad ay isa sa mga maituturing na special na potahe sa mga special na handaan, masarap at malinamnam kaya gustong gusto ito ng karamihan bata man o matanda. Madali lang ang pagawa nito.

Mga Sangkap:
3/4 kilo elbow macaroni
2 lata gatas na condensada
6 tetra pack All purpose cream
1 malaki lata fruit cocktail
1 tasa pasas
1/2 tasa mayonaise
1 tasa keso (diced)

Paraan ng Pagluluto:
1. Lutuin ang macaroni ayon sa instruction na nakasulat sa package nito. Pagkatapos maluto, patuluin ang tubig at hintaying lumamig.
2. Paghaluin ang lutong macaroni at lahat ng mga sangkap at palamigin sa refrigerator bago i-serve.